Навагодняя казка
18.12.2023Хутка прыйдзе Новы год. Гэта час, калі і дзеці, і дарослыя вераць у цуды і загадваюць самыя запаветныя жаданні. А сустрэча з Дзедам Марозам – гэта захапляючае падарожжа па казачнай краіне, поўнае навагодніх прыгод і цікавых цудаў. Вучні пачатковых класаў Сыраваткінскай базавай школы пабывалі ў такім падарожжы і наведаліся ў сядзібу Ляснога Дзеда Мароза на навагодняе прадстаўленне, якое праходзіла на базе паляўнічага комплексу “Арэхаўка” Смаргонскага даследчага лясгаса.
Адразу мы наведаліся ў базісны лесапітомнік, дзе хлопчыкаў і дзяўчынак сустрэлі казачныя героі: Праменьчык і ласкавая Кошка. І казка пачалася…
Не абыйшлося тут без чарадзейства Бабы Ягі, якая хацела сапсаваць свята і разбіла навагодні гадзіннік, зачаравала Дзеда Мароза. Але дзеці вырашылі правучыць Бабу Ягу.
Розныя конкурсы, гульні, танцавальныя флэш-мобы – весела і займальна праходзіў час. Хітрая Ліса і Гарын Гарыныч спрабавалі абхітрыць, зачараваць дзяцей і забраць мяшок з падарункамі. Але ў іх нічога не атрымалася. Маленькія падарожнікі змаглі прайсці ўсе выпрабаванні і сустрэцца з Дзедам Марозам, які гасцінна запрасіў вучняў у свой церам, дзе стаяла і зіхацела рознакаляровымі агнямі прыгожая ёлка. І зноў конкурсы, песні, карагоды ля ёлкі з Дзедам Марозам і Снягуркай! Усе ўдзельнікі мерапрыемства атрымалі добры зарад святочнага настрою.
У канцы прадстаўлення дзеці пачаставаліся духмянай гарбатай і змаглі наведаць навагодні кірмаш, дзе набылі сабе на памяць аб навагодняй казцы розныя сувеніры.
Людміла Раманоўская, настаўнік рускай мовы і
літаратуры Сыраваткінскай базавай школы
Смаргонскага раёна Гродзенскай вобласці