У сёмай школе падвялі вынікі Года гістарычнай памяці
22.12.2022Каляндарны год падыходзіць да свайго завяршэння, таму час азірнуцца назад і падвесці вынікі.
У сярэдняй школе № 7 г. Смаргоні прайшло традыцыйнае мерапрыемства ў рамках рэспубліканскага праекта “Школа Актыўнага Грамадзяніна”. Вучні 8-11 класаў разам з запрошанай госцяй – старшынёй грамадскага аб’яднання “Беларускі саюз жанчын”, начальнікам аддзела ідэалагічнай працы і па справах моладзі Ганнай Уладзіміраўнай Джумковай – падводзілі вынікі Года гістарычнай памяці. Тэма мерапрыемства – “Гонар за Беларусь. Захоўваем мінулае, шануем сучаснае, будуем будучае”.
Пачалося мерапрыемства з найгрышаў узорнага ансамбля народнай музыкі “Гулянок”, якія дазволілі прысутным адчуць асалоду ад беларускіх мелодый.
Падчас сустрэчы старшакласнікі гаварылі пра пошукавую і даследчую дзейнасць, пра гонар нашай краіны, пра гістарычную памяць як сувязь часоў і пакаленняў.
З інфармацыяй пра дасягненні Рэспублікі Беларусь у культурнай і гістарычнай галіне пазнаёмілі вучні 9 “А” класа.
Вельмі цэннымі звесткамі, звязанымі з тэмай гістарычнай памяці, падзялілася з вучнямі Ганна Уладзіміраўна. Дзеці даведаліся, што існуюць спецыяльныя службы, якія дапамагаюць знайсці месцы пахавання загінуўшых у час войнаў бабуляў або дзядуляў. Узгадалі аб месцах нашага горада, дзе размешчаны помнікі і памятныя таблічкі з імёнамі тых, хто памёр ад рук ворагаў.
Дзякуючы прэзентацыі “Гістарычныя каштоўнасці Смаргоншчыны”, якую паказала Ганна Уладзіміраўна, старшакласнікі ўспомнілі, што побач з намі ёсць помнікі культуры і архітэктуры не толькі нацыянальнага, але і міжнароднага значэння. Сярод іх фрагменты Крэўскага замка, музей-сядзіба Агінскага ў Залессі, дом-музей Францішка Багушэвіча ў Кушлянах, касцёл Маці Божай Ружанцовай у Солах і многія іншыя.
“Хто забыў сваіх продкаў – сябе губляе, хто забыў сваю мову – усё згубіў,” – гэтыя словы У. Караткевіча падвялі вынік сустрэчы і нагадалі аб тым, што памяць – адна з найважнейшых якасцяў чалавека, якая дазваляе яму ўсвядоміць асабістае месца ў грамадстве і навакольном свеце.
Напрыканцы мерапрыемства вучням, якім споўнілася 14 гадоў, госця ўручыла падарункі – кнігі “Я – грамадзянін Рэспублікі Беларусь”.